اقتراحات لهدية عملية ومفيدة لوالدي – عمره ٧٠ سنة؟

هات لوالدك مرتبة حديثة جميلة يربح جنبه الكريم عليها
اوً صلَّح له الحمام والمطبخ اللي بايظ أو حدثه
وممكن تبيض له الشقة كمان

وتعهد هدومه البيتية والخارجية وحذاءه الشريف
ومره بطانية ومرة سجادة
ومرة تصلح دولاب ومرة سرير ومره جهاز

اتحف والدك الجليل بنضارة غير القديمة دي
وكل فترة اشتري لنفسك فيه شيء بيحبه
وركز أكتر في اللي بيحبه أكتر والشيء اللي مش ممكن يطلبه
وراجع حتى غياراته وشراباته العزيزة
وكل ما تخلَص إزازة ريحته عطر نفسك فيه وفرحه بإزازة جديدة
أما دواؤه فأولى من الماء الذي تشرب

اوعى تتصور إنهم خلاص أكلوا كل شيء
وشربوا كل شيء وإنك أولى بالحياة منهم

هم أولى بكل جميل وجديد في الحياة
هم أصلًا الحياة

احفظ والديك بين لطفك وعطفك وعانقَهم
من قبل أن تصبح بيوم كئيب مفارقهم

سجاده صلاه مبطنه..كرسي هزاز ..كرسي lazy boy..مخده جل ..مصحف وقلم اليكتروني ..دفايه بريموت ..روب دفايه موهير …مكنه حلاقه كهربا ..مايكرويف..منظم ادويه ..ووجودك اهم من الهدايا..رحم الله والدي

بصى فى عدسة مكبرة على شكل كارت كدة جبتها من امازون بتبقى حلوة اوى لو عايز يقرا حاجة خطها صعير
يعنى مثلا تاريخ صلاحية او حاجة

مرتبة تريح ضهرة
ميكرويف يسهل عليه دخول المطبخ
تلفزيون جميل يسلية
اشتراك بي ان لو بيحب كوره
كرسي ليزي بوي
هدوم شتوي انيقه و روب شتوي يدفيه و شوية شرابات
بالطو يدفيه في الخروج
و الاهم من ده كله انه يبقي رقم واحد في حياتك
ربنا يخليهولك و ميحرمكيش منه ابدا و يطول عمرة و يمتعه بالصحة و العافيه

عارفه احلى حاجه تخرجيه في مكان مفتوح وشمس حلوه وفطار مع قهوة الصباح

بصراحه أحلى هدية أنك تقعد معاه وتقرب منه قوى وتحسسة انك بتحبة وحنين علية وانك صاحبة واحكى معاه وحسسة انك مش بتعرف تعمل حاجة من غيرة وهى دى الحقيقة فعلا ولو انت فى شغلك أتصل أسأل عليه لحد ما ترجع

لو هو ببلبس جلبيات الشتا داخل هاتلة جلابية تكون صوف او عباية صوف بلبسها على الجلابية

لو بيلبس بناطيل وجواكت هاتلة جاكت صوف لان هيكون محتاج يدفى اكتر

ممكن شوز طبى يريحة فى المشي

ممكن ماكينة حلاقة يحلق فى البيت

ممكن موبايل او تابلت يتصفح النت مثلا ويتسلى علشان ميزهقش

مخده طبيه ومرتبه سوست طبيه مثلا
شراب دفايه
بجامه دفايه
ميكرويف جنب منه يسخن فيه الاكل لو لوحده
او كرسي كهربا لو الحركه بعافيه شويه
اي حاجه تسهل الدنيا عليه

لو بينزل يصلي الفجر هاتيلو حذاء بسيط طبي يكون خفيف على رجله
وعدي ثواب الخطوات للمسجد
وعموما هتنفعه فى النزول وربنا يديه الصحة يارب
هاتيلو مسبحة الكترونية هيفرح بيها اوي
اي حاجة تسليه ويفتكرك طول ما هي جمبه ويفضل يدعيلك
اهم حاجة وانتي رايحة خدي معاكي اكلة حلوة بيحبها واعملى كل اللي نفسه فيه وربنا يبارك في عمره وصحته ويراضيكي برضاه عنك

بصي انا كنت دايما اجيب حاجات لبابايا ربنا يكرمه بالجنه يكون بيحبها
وكل عيد كنت بجبله بيجامه او جلبيه
وممكن لو بياخد ادويه كتير تجبيله منظم الادويه
وممكن قميص نضيف شكله حلو من واكيكي
وممكن شربات لو بيلبس نوع معين
ياريت بابا يكون موجود علشان وحشني اهتم بيه اوي

حاولي تجيبي حاجة كان بيفكر يجيبها أو حسيتي إنه عايزها
لو ظروفك تسمح خلي الهدية قيمة وبشكل عام تقدميها بأشيك وأجمل طريقة ممكنة
المهم أيًا كانت الهدية حاولي تخليه يفرح ويوصل له إنك بتحبيه أوي
وخلي نيتك هو بر والدك طاعة لله
استغلي كل لحظة هو معاكِ فيها
ربنا يبارك لك فيه

ممكن موبايل او تلفزيون عليه يوتيوب انا بابا اكبر منه بيحب اليوتيوب جدا عملت له متابعة لقنوات طبية ورياضية على موبايله و علمته ازاى يبحث عن الشيخ عبد الباسط والمنشاوى مشايخه المفضلين فى التلاوة

دفايات شتوي ثيرمال ،وبيجامتين شتوي سبورتينج شيك يقعد وينزل بيهم من غير مايدور ع حاجة يلبسها كل مايحب ينزل أو يجي حد

عكاز مخدة رقبة مخدة طبية
راديو لو بيحب الإذاعة إذاعة القرآن الكريم
لو عندك امكانيه كرسي مساج مريح
رحلة عمره
أكله حلوة
مصحف خط كبير وحامل له يقرأ فيه
والأهم من كل دول تزوه وتبقوا حواليه

خروجه حلوه مريحه.. روبين و لكلوك مريح و شربات قطن تقيله.. طربيزة لاب صغيرة بتفتح و تقفل يقدر يقرأ عليها أو يتفرج على الموبايل وهو فى السرير فى الشتا.. مج مبهج.. كتاب لكاتب بيحبه.. أو شوفوا ايه محتاجه و ناقصه فى البيت أو محتاج يتصلح و أعملوه له

على حسب هوا بيحب ايه او ناقصه ايه ترنج رجالي عباية للصلاه حامل للمصحف يقرأ منه وهوا أعد مكانه كاب للرأس صوف يدفي دماغه في البرد كوفيه روب طقم تتقيل حتى لو غيارات الفكرة في اللي محتاجة او هيبسطه وهما حبايبي بيحبوا يحسوا بإهتمامنا بيهم ربنا يبارك فيهم ويديمهم فوق رأسنا

عصاية للمشي لو محتاجها ، دفاية بالكهربا لو رجله بتبرد في الشتا ، ممكن بيجامة للبيت او روب لو بيحبه ، راديو بالبطارية علشان ياخده معاه السرير ، كرسي صغير يحطه تحت رجله علشان متورمش