[Abd Elaziz]

السلام عليكم ورحمة الله؛ ممكن تساعدوني بأفكار هدية لوالدي. عنده ٧٠ سنة… حاجة عملية تفيده أو تسهل عليه أي حاجة. مش ساعة وكرافتة وبرفيوم وكده يعني.. وشكرا ليكم

[Nehal]

هات لوالدك مرتبة حديثة جميلة يربح جنبه الكريم عليها
اوً صلَّح له الحمام والمطبخ اللي بايظ أو حدثه
وممكن تبيض له الشقة كمان

وتعهد هدومه البيتية والخارجية وحذاءه الشريف
ومره بطانية ومرة سجادة
ومرة تصلح دولاب ومرة سرير ومره جهاز

اتحف والدك الجليل بنضارة غير القديمة دي
وكل فترة اشتري لنفسك فيه شيء بيحبه
وركز أكتر في اللي بيحبه أكتر والشيء اللي مش ممكن يطلبه
وراجع حتى غياراته وشراباته العزيزة
وكل ما تخلَص إزازة ريحته عطر نفسك فيه وفرحه بإزازة جديدة
أما دواؤه فأولى من الماء الذي تشرب

اوعى تتصور إنهم خلاص أكلوا كل شيء
وشربوا كل شيء وإنك أولى بالحياة منهم

هم أولى بكل جميل وجديد في الحياة
هم أصلًا الحياة

احفظ والديك بين لطفك وعطفك وعانقَهم
من قبل أن تصبح بيوم كئيب مفارقهم

[Eng Fathy]

أنا فى سن والدك تقريبا .. ولو فى مكانه ح اطلب الاتى ..كتروا من زيارته .. اسالوا عليه كتير .. خلوا أحفاده تكلمه من وقت للتانى فى التليفون .. اى هدايا مهما كانت بسيطه بتسعده .. متجبيش هدايا غالية .. لأن ده بيقلقه عليكى انك بتكلفى نفسك .. صدقينى لما بيفتح الباب ويلتقى أولاده قدامه وبدون اى هدايا بيكون اسعد شخص فى الدنيا .. ربنا يبارك فى صحته ويخليه لكم ..

[Randa]

سجاده صلاه مبطنه..كرسي هزاز ..كرسي lazy boy..مخده جل ..مصحف وقلم اليكتروني ..دفايه بريموت ..روب دفايه موهير …مكنه حلاقه كهربا ..مايكرويف..منظم ادويه ..ووجودك اهم من الهدايا..رحم الله والدي

[Randa]

بيجامة شتوي تقيلة و قماشتها ناعمة
مخدة طبية
كوتشي مريح زي اسكيتشرز مثلا

[Randa]

بصى فى عدسة مكبرة على شكل كارت كدة جبتها من امازون بتبقى حلوة اوى لو عايز يقرا حاجة خطها صعير
يعنى مثلا تاريخ صلاحية او حاجة

[Salwa]

مخده طبيه لرقبته وظهره او سبحه قيمه وخفيفة وزنا او سليبر طبي او كوفيه صوف ناعمه … كل سنه وهو طيب وبصحة

[Shereen]

مرتبة تريح ضهرة
ميكرويف يسهل عليه دخول المطبخ
تلفزيون جميل يسلية
اشتراك بي ان لو بيحب كوره
كرسي ليزي بوي
هدوم شتوي انيقه و روب شتوي يدفيه و شوية شرابات
بالطو يدفيه في الخروج
و الاهم من ده كله انه يبقي رقم واحد في حياتك
ربنا يخليهولك و ميحرمكيش منه ابدا و يطول عمرة و يمتعه بالصحة و العافيه

[Emad]

كرسي هزاز مريح مع كرسي يد صغير يقدر ينقله في اى مكان
سجادة صلاه مبطنه وناعمة
وطبعا حضرتك أدرى الناس بما يحب ويناسب استخدامه اليومى
وأحب شئ ليه هو الجلوس معاه وتذكر الأيام الخوالى

[Samia]

عارفه احلى حاجه تخرجيه في مكان مفتوح وشمس حلوه وفطار مع قهوة الصباح

[احمد]

هات اولادك واقعد معاه والعبو مع بعض يوم كامل ويوم تاني اقعد معاه وخليه يتكلم عن الحاجات الحلوه اللي فاتت من حياته وخليه يتذكر ذكرياته الجميله وخليه يتكلم اكتر وانت انصت وانتبه ليه وهو بيتكلم يعني متكنش ماسك موبايل او مشغول بشئ اخر وطبعا لو فيه اكله معينه بيحبها تبقي تمام

[Dr-Boto]

بصراحه أحلى هدية أنك تقعد معاه وتقرب منه قوى وتحسسة انك بتحبة وحنين علية وانك صاحبة واحكى معاه وحسسة انك مش بتعرف تعمل حاجة من غيرة وهى دى الحقيقة فعلا ولو انت فى شغلك أتصل أسأل عليه لحد ما ترجع

لو هو ببلبس جلبيات الشتا داخل هاتلة جلابية تكون صوف او عباية صوف بلبسها على الجلابية

لو بيلبس بناطيل وجواكت هاتلة جاكت صوف لان هيكون محتاج يدفى اكتر

ممكن شوز طبى يريحة فى المشي

ممكن ماكينة حلاقة يحلق فى البيت

ممكن موبايل او تابلت يتصفح النت مثلا ويتسلى علشان ميزهقش

[Dolly]

راديو القران وموبايل سمارت وتركبيله راوتر عشان يقعد براحته ع النت وساعتها هتفرحيه اووووى ربنا يحنن قلوب ولادنا علينا زى ما احنا حناينين ع اهلينا

[Dolly]

مخده طبيه ومرتبه سوست طبيه مثلا
شراب دفايه
بجامه دفايه
ميكرويف جنب منه يسخن فيه الاكل لو لوحده
او كرسي كهربا لو الحركه بعافيه شويه
اي حاجه تسهل الدنيا عليه

[Rahma]

كوتشي مريح
لو بيلبس نظارة مثلا هاتله واحدة جديدة

[Rania]

لو بينزل يصلي الفجر هاتيلو حذاء بسيط طبي يكون خفيف على رجله
وعدي ثواب الخطوات للمسجد
وعموما هتنفعه فى النزول وربنا يديه الصحة يارب
هاتيلو مسبحة الكترونية هيفرح بيها اوي
اي حاجة تسليه ويفتكرك طول ما هي جمبه ويفضل يدعيلك
اهم حاجة وانتي رايحة خدي معاكي اكلة حلوة بيحبها واعملى كل اللي نفسه فيه وربنا يبارك في عمره وصحته ويراضيكي برضاه عنك

[Zuhoor]

بجد بوست مبهج اوي الحقيقة.. ربنا يديه الصحة والعافية يارب ويجعلك من الابرار..
اقترح تخرجو يوم سوا، ممكن تشتريله حاجة قديمة زي راديو، سبحة، بخور، عود، شرابات قطن، منديل قماش
محفظة جلد، وادخلي استوديو واتصوروا كارت يوثق الذكري قبل مايخلص اليوم
وكل سنة وهو طيب وسعيد وانتم مع بعض

[Yora]

بصي انا كنت دايما اجيب حاجات لبابايا ربنا يكرمه بالجنه يكون بيحبها
وكل عيد كنت بجبله بيجامه او جلبيه
وممكن لو بياخد ادويه كتير تجبيله منظم الادويه
وممكن قميص نضيف شكله حلو من واكيكي
وممكن شربات لو بيلبس نوع معين
ياريت بابا يكون موجود علشان وحشني اهتم بيه اوي

[MonMon]

اى حاجه هتجبيها حضرتك هيفرح بها اوى حضرتك ممكن تريننج تقيل يلبسه فى البيت او شبشب صوف منبه عليه مواعيد الاذآن بصوت او عداد الاستغفار للتسبيح

[Muhammad]

حاولي تجيبي حاجة كان بيفكر يجيبها أو حسيتي إنه عايزها
لو ظروفك تسمح خلي الهدية قيمة وبشكل عام تقدميها بأشيك وأجمل طريقة ممكنة
المهم أيًا كانت الهدية حاولي تخليه يفرح ويوصل له إنك بتحبيه أوي
وخلي نيتك هو بر والدك طاعة لله
استغلي كل لحظة هو معاكِ فيها
ربنا يبارك لك فيه

[Rasha]

لو بيحب بيشرب قهوة في ماكينه بتعمل قهوة تركي اسمها Biko اعتقد موجوده على امازون بتسهل عمل القهوة قوي و بتطلع مظبوطة تحفه

[Walaa]

ممكن موبايل او تلفزيون عليه يوتيوب انا بابا اكبر منه بيحب اليوتيوب جدا عملت له متابعة لقنوات طبية ورياضية على موبايله و علمته ازاى يبحث عن الشيخ عبد الباسط والمنشاوى مشايخه المفضلين فى التلاوة

[Lara]

جهاز إسمه أليكسا بيتجاب من أمازون بياخد أوامر صوتيه و ينفذها بالتشغيل أو الغلق أو ممكن تبرمجيه على الباب أو التليفون يتصله بحد أو الإضاءه و أي جهاز

[Samar]

دفايات شتوي ثيرمال ،وبيجامتين شتوي سبورتينج شيك يقعد وينزل بيهم من غير مايدور ع حاجة يلبسها كل مايحب ينزل أو يجي حد

[Norhan]

اعزمه بره ع الغدا ف مطعم رايق من اللي بيشغلو اغاني زمان
و بعدين اقعدو ف اي نادي عالنيل اشربو شاي او قهوه و اتكلمو سوا
دي احلي واغلي و احن هديه حقيقي

[أسماء]

عكاز مخدة رقبة مخدة طبية
راديو لو بيحب الإذاعة إذاعة القرآن الكريم
لو عندك امكانيه كرسي مساج مريح
رحلة عمره
أكله حلوة
مصحف خط كبير وحامل له يقرأ فيه
والأهم من كل دول تزوه وتبقوا حواليه

[Shehap]

فكرة دي عملتها مع جدي الله يرحمه لو معاك قرشين.

هات بدلة لي وسافرو الغردقة او اي حتي واتفسحو وغير جو واكله سمك محترمة وحكاوي بينكم واتصورو هتفتكرو اليوم ده علي طول بدل الهدية مش بنفتكرها علي قد الذكريات.

[Mero]

خروجه حلوه مريحه.. روبين و لكلوك مريح و شربات قطن تقيله.. طربيزة لاب صغيرة بتفتح و تقفل يقدر يقرأ عليها أو يتفرج على الموبايل وهو فى السرير فى الشتا.. مج مبهج.. كتاب لكاتب بيحبه.. أو شوفوا ايه محتاجه و ناقصه فى البيت أو محتاج يتصلح و أعملوه له

[Dina]

نضاره جديده ازا كان بيلبس نضاره عكاز بالنور بتاعه عشان ازا نزل وقت الفجر يصلي جهاز مساج صغير يتحطم في اوصله يستخدمه لتدليك الرقبه و الدراع و كده بيبقي ممتاز اسال عليه في النت

[Shaimaa]

على حسب هوا بيحب ايه او ناقصه ايه ترنج رجالي عباية للصلاه حامل للمصحف يقرأ منه وهوا أعد مكانه كاب للرأس صوف يدفي دماغه في البرد كوفيه روب طقم تتقيل حتى لو غيارات الفكرة في اللي محتاجة او هيبسطه وهما حبايبي بيحبوا يحسوا بإهتمامنا بيهم ربنا يبارك فيهم ويديمهم فوق رأسنا

[Riham]

المصحف الكبير اللى بإستاند ده حلو اوى والكلمات فيه بحجم كبير ومريح . ممكن جهاز راديو الصغير اللى بفلاشه يكون جمبه على طول ويستمع لاى سوره وقت ما يحب بالصوت اللى بيحبه … فوت وير فرو اللى بيكون مبطن ده بيدفى جدا فى الشتا وشيك اوى مع كوفيه صوف جديده

[Nora]

عصاية للمشي لو محتاجها ، دفاية بالكهربا لو رجله بتبرد في الشتا ، ممكن بيجامة للبيت او روب لو بيحبه ، راديو بالبطارية علشان ياخده معاه السرير ، كرسي صغير يحطه تحت رجله علشان متورمش

[الكاتب]

المشاركات