[Mohamed]

هو اللي رايح يشتري شقه تمليك وهيدفع شقي عمره فيها من حقه يجيب معاه مهندس يكشف علي الاساسات بتاعة العمارة ولا مش من حقه؟ وده بسبب العماير اللي كل يوم نسمع انها بتقع؛ الواحد بقي مرعوب.

[Abdo Halim]

حقه طبعا ويتاكد من الإجراءات القانونية.

ولو حضرتك غير مُلم بالأمور العقارية والقانونية.

فنصيحة من محام من أجل الحفاظ على حقوقك وأموالك.

لابد من محامي متخصص يكون معاك أثناء الشراء أو البيع.

[Manar]

اه عادي في المعاينه من حقك تجيب مهندس و تروح اكتر من مره كمان متستعجلش في شرا اي شقه

[الشامخ]

العمارات اللى بتقع دى كلها إيجار قديم، يعنى الشقه بخمسه جنيه في الشهر بسبب قانون الإيجار القديم اللى إتأخروا جامد فى تعديله.

المالك طبعا مش بيعمل صيانه للبيت من الخمسه جنيه. والمستأجر عارف كويس إن سكنه بخمسه جنيه فى الشهر مش هيستمر ..فبيستخسر يصرف صيانه على البيت.

والنتيجه اللى هنشوفها كل يوم ارواح ناس هتصيع تحت الانقاض.

لكن حضرتك هتشترى تمليك وهتلاقى نفسك وباقى الشقق بتدفعوا صيانه كل شهر حوالى ٤٠٠ جنيه.

وممكن اكتر…من الفلوس دى مواسير النيع والصرف والمجارى هتتصلح والبيت مش هينهار زى بيوت قانون الايجار القديم.

[Zekry]

حضرتك احنا علشان نعمل كشف علي الاساسات اول حاجة بنطلب لوحات انشائيه للأساسات بكامل تفاصيلها لو متاح وبننزل الموقع وبنكشف علي جميع الاساسات نتأكد من ابعاد الخرسانة ونعمل جس للحديد داخل القواعد ونتأكد انه زي الموجود في التصميم دة في حالة وجود لوحات انشائيه زي ما قولت لحضرتك بعد كدة بنعيد الحسابات التصميمية ونتأكد ان الاساسات دي تقدر تتحمل بالمبني ده.

وعلشان نتكلم بسمل عملي دة مش هيحصل الموضوع مرهق ومكلف ومفيش صاحب عقار هيقبل بالكلام دة ولو قبل الاساسات ممكن تكون كويسة بس التربه تحتها ضعيفة ممكن يحصل هبوط

طب نعمل ايه؟ حضرتك هتحتاج مهندس يعمل معاينة ظاهريه للمكان ويتأكد المكان دة انشائيا من الفحص البصري آمن ومفيش فيه مشكلة ونصيحة ليك دايما اشتري في عقار جديد ( مباني حديثة) بلاش العقارات اللي من ايام الاحتلال كل حاجة وليها عمر افتراضي اكيد.

يجي بعد كدة الشق القانوني ودة هتحتاج فيه محامي شاطر.

وربنا يوفقك.

[Chance]

ويروح الإدارة الهندسية ويتأكد من كل الإجراءات انها مبنيه قانونيه وملهاش مخالفات

[Rabab]

ده مهندس وسباك ومحامي وتشوف فواتير الكهربا والمايه والغاز مدفوعه لحد شهر كام واوعي متجبش محامي يكون شاطر عشان العقود بيحصل فيها حوارات كتير ولو حضرتك مش فاهم او محامي مش شاطر الدنيا ممكن تبقي مش حلوه زي ماهو هياخد حقه حضرتك تضمن حقك.

[Amro]

طبعا غير انه لازم يكشف عليها فى الحى و فى المنطقة فى موضوع الازالات لان فيه شقق حاليا بتلاقى سعرها واقع و بيتضح بعد كده ان فيه احتمال العمارة تدخل ازالة فصاحبها بيلحق يخلص منها.

[الكاتب]

المشاركات