[ربيع]

السلام عليكم هو ياجماعة أسعار الفاكهة ايه الحكاية احنا فحلم ولا فعلم لما كل صنف الكيلو بل ٨٠ و٩٠ ١٠٠ جنية طب الاسعار الخرافية دي في سوق العبور كمان ولا ايه قسم بالله الواحد ماعارف يجيب ٣ كيلو من كل صنفين فاكهة من الاسعار النار هو الإخوة الفكهانية عندهم الحاجة تبوظ وتترمي ولا أنهم يبيعوها بمايرضي الله طب مانشتريش لحد ماغصب عنهم ينزلو سعر الحاجة ولا نعمل ايه احنا الفكهانية وبتوع الخضار معندهمش رحمة في الأسعار كل واحد بيرفع في الكيلو ب العشرين جنية.

[Sahar]

الفكاهنيه فعلا بيستهبلوا في الاسعار
خصوصا ف التجمع اسعارهم اضعاف اضعاف المناطق الشعبيه او سوق العبور
فاما حضرتك تنزل اقرب سوق شعبي او كل مجموعة من الجيران تشترك في كراتين فاكهه او خضار من سوق العبور
جيراني بيشتركوا ف شوال البطاطس وقفص الطماطم وهكذا

[Na Shwa]

وياريت طعمها عدل معظمها ناشف وماسخ

[Sliem]

السنه دى الفاكهه سعرها عالى اوى بطريقة ملفته حتى الموز والبرتقال بقوا ب٤٠ الموز اللى كان لما يغلى يبقى ٢٠ و١٥

[Sliem]

ناخد بالنا طبيعى الفاكهة تبقى غالية فى أول الموسم بتاعها أو فى غير موسمها ….. طبعاً فيه تجار بتبيع بالغالى بس اللى يدور شوية هيلاقى أسعار معقولة و لسة هتنزل كمان فى وسط الموسم

[نبيل]

الحق مش عليهم ،،،الحق على الدولة السايابة) لاقانون ولا رقابة والعملية سداح مداح ،،الموز ب٣٥ والبطبخ ب١٧٠ والجوفة ب٤٥ ، العنب ب٨٠،،،هو فيه ايه؟ والحكومة يايبة الدنيا تولع والقوى فارد على الضعيف ويقصقص في معيشته،،ربنا يستر على ثورة الجائع

[EM AN]

التجار بيخدوا المحصول من الفلاح بتراب الفلوس ويرفعوا السعر اضعاف مضاعفه
الحل هنا
ان الفلاح يوصل للمستهلك مباشر
بدون حلقة التاجر
لان التاجر هنا جشع جدا
وطبعًا في ظل غياب الرقابه على الاسعار
كل واحد بيبيع براحته وبمزاجه
وهتلاقي تفاوت رهيب في الاسعار في اماكن مختلفه

[Andrew]

طيب هو بعيدا عن الفتي
الاجابة ببساطة ان الحكومة عايزة دولار
فبتصدر معظم الانتاج بتاعنا
ونتيجة لدة فالمعروض قليل والطلب كبير وعلشان كدة الاسعار ضربت
وعلشان كدة برضو هتلقي ان معظم الموجود في السوق هو زبالة الانتاج او البواقي

[Bassem]

ومين في البلد بيتعامل بما يرضى الله ده حتى الإخوه الدكاتره وشركات الادوية مبقاش عندهم رحمه حسبي الله ونعم الوكيل

[Amira]

هو فعلا فيه استغلال و كمان مفيش تسعيره من الحكومه ولا رقابه فبالتالي بتلاقي تفاوت في الأسعار بال ٢٠ و ٣٠ ج في الصنف ده حتي كيلو البطيخ فيه تفاوت من ٧ ل١٠ ج في الكيلو

[Hashem]

العبور ارخص بكتير وعموما حضرتك تقدري تقدمي شكوي وبتنزل حملة تشوف الشكوى وعن تجربة من جهاز حماية المستهلك نزلو عشان شكوي في ارتفاع أسعار المهم تحديد مكان بعينه

[Ahmed]

من حوالي سنه رحت لبتاع الفاكهه قلتله الواحد بدال ما يشتري ٢ لتر بيبسي ب ٣٥ جنية ومقاطعة ومش مفيد يروح يشتري ٢ كيلو موز ولا برتقال اهو افيد واحسن

امبارح رحت لنفس الفكهاني بقوله الموز بكام قالي ب ٤٠ جنية قمت رحت اشتريت ٢ لتر بيبسي وروحت البيت

[الكاتب]

المشاركات